Gica pabayron sa wa nataud nga CCTV cam
CEBU, Philippines — Gimanduan sa Commission on Audit si kanhi Dumanjug Mayor Efren Guntrano Gica ug laing duha ka opisyal sa pagbayad sa wala nataud nga mga close circuit television (CCTV) camera.
Kini base sa Notice of Finality of Decision (NFD) nga giluwatan sa COA niadtong Mayo 25, 2018.
Sila si Gica, kanhi municipal administrator Danilo Macoy ug property custodian Visitacion Abelo ang gitumbok sa COA nga manubag sa wala pagtaud sa ubang parte sa mga CCTV camera human sa ila gihimo nga auditing.
Kini naglakip sa walo ka video ballun ug usa ka 8 channel video ballun hub sa executive building, 16 ka video ballun sa public market, unom ka video ballun sa rural health unit, upat ka outdoor wireless CPE ug 20 ka access point post alang sa roadway, ug usa ka lot sa testing commissioning nga mobalor og dul-an sa P200,000 nga maoy pabayran sa COA.
Kabahin kini sa gipalit nga mga CCTV camera nga balor og kapin P1 milyon niadtong Oktubre 29, 2015 dihang acting mayor si Gica.
Lakip sa gimanduan nga pabayron ang M & J Auto ID Corp. nga maoy supplier sa maong mga kahimanan.
Una na nga niluwat og Notice of Disallowance (ND) ang COA niadtong Pebrero 26, 2016 apan nakaapelar si Gica ug kaubanan.
Ang NFD nga gipirmahan nilang Audit Team Leader Paul Tolomia ug Supervising Auditor, Atty. Eva Cabrera, nadawat ni Mayor Rainero Asentista niadtong Hunyo 28, 2018. (BANAT NEWS)
- Latest
