P1.5M shabu nasakmit

CEBU, Philippines — Pito ka tawo apil ang uyab sa gipasanginlang drug pusher ang nasikop ug mokabat P1.5 milyon nga drugas ang nasakmit sa managlahing operasyon sa kapolisan diha sa Mandaue, Lapu-Lapu ug Cebu City.

Sa gipahigayon nga joint  buy bust operation sa Drug Enforcement  Group (DEG) ug Presinto 3 sa Mandaue City Police Office (MCPO) nadakpan sila si Raniel Garrido ug ang giingong buntis nga babaye nga si Barbara May  Fernandez, nagpuyo sa barangay Basak sa maong dakbayan.

Matud pa ni Superintendent Glenn Mayam, hepe sa DEG Central Visayas nga ilang nasakmit gikan sa maong mga dinakpan ang 125 gramos nga shabu nga mokabat sa P1.4  milyones.

Si Mayam miingon nga si  Fernandez  alyas Bam-Bam maoy giila nga dakong pusher  sa lalawigan sa Sugbo.

Laing nadakpan usab sa buy bust operation sa dalan  Catalino Street, Barangay Looc  sa Dakbayan sa Mandaue si Sheilamar Dela Torre, 29,  taga Kamputhaw, Dakbayan sa Sugbo kauban niini nga si Aljie Cabada, 22,  taga Dakbayan sa Talisay.

Si Chief Inspector Mercy Villaro, information officer sa Mandaue City Police Office (MCPO miingon nga si Dela Torre hinigugma ni Steve Go nga nag-atubang og kaso sa drugas nga kanhi nabilanggo sa Talisay City Jail apan gibalhin sa Mandaue City Jail karon.

Giingong napalitan siya og usa ka medium size nga paketeng shabu. Matud pa nga human nasikop si Dela Torre, nakaestorya pa niini si Go sa cellphone ug aduna pa unta ipatransaksyon nga lain apan nakabantay kini nga nadakpan na ang uyab ug dali-daling giputol ang tawag.

Si Dela Torre nihimakak sa pasangil kay matud niya padulong sila sa Dakbayan sa Lapu-Lapu alang blessing sa balay sa iyang amiga. Si Cabada nihimakak nga may kasayuran siya sa kalihokan ni Dela Torre kay drayber lang kini.

Samtang sa Sitio  Sac 2,  Barangay Mactan, Dakbayan sa Lapu-Lapu maoy nadakpan sila si Norman Sanico Sabanal, 31, ug Michael  Pasibog Surban, 31, nga nakuhaan og walo ka gagmay nga putos nga shabu.

Sa Barangay Marigondon nadakpan usab si Jayson Veraque Reroma, 19, nga nakuhaan og pinaketeng gidudahang shabu. (IBM) (BANAT NEWS)