PDEA: Pagkamatay sa suspects di maayo
CEBU, Philippines - Unom na ang nakalas sa gipahigayon nga operasyon sa mga sakop sa Philippine Drug Enforcement Agency (PDEA)7 sukad Agosto 1 hangtod kagahapon.
Si Leia Albiar, tigpamaba sa PDEA7 nga nahinabi sa Banat News miingon nga karon lang buwana nakahimo na sila og 16 ka mga operasyon ug 12 ang nasikop, usa ang nakaeskapo ug unom ang nakalas human nisukol sa mga operatiba.
Apan giklaro ni Albiar dili nila gusto nga mapusilan ang ilang mga dakponon kay gusto nilang makakuha pa og dugang impormasyon apan aduna gyud kanila ang manukol.
Giklaro ni Albiar nga dili maayo sa kampanya kontra ilegal nga drugas nga mangamatay ang ilang mga dakponon kay maputol na ang kutay sa impormasyon nga ilaha pa untang makuha.
Labaw sa tanan, dili nila buot nga mabutang sa peligro ang kinabuhi sa mga tawo diha sa lugar sa operasyon ug sa ahente sa PDEA mao nga mapugos sila pag-neutralize sa mga suspek. (BANAT NEWS)
- Latest