Dino gipasanginlan ni Osmeña

CEBU, Philippines - Mipasangil si Cebu City Mayor Tomas Osmeña ni Presidential Assistant for the Visayas Michael Dino nga maoy nagpaluyo niining mga personalidad nga nisupak sa Bus Rapid Transit (BRT) Project.

Kahinumduman si Engineer Rene Santiago nga usa ka transportation and Engineering Expert, si Regional Development Council (RDC)-7 Chair Kenneth Cobonpue, Presidential Assistant for the Visayas Michael Dino pulos nipadayag sa ilang pagsupak sa BRT project.

Ning bag-ohay lang, si kanhi Cebu City mayor Alvin Garcia mipadayag usab sa iyahang pagsupak sa maong proyekto kay gagmay ang dalan. Gihulagway ni Osmeña nga klaro kaayong giplano ang tanan.

“You watch his body language, of course you’ll say I’m biased but you just observe I will tell the President to cancel the BRT hambugero gyud,” sigon ni Osmeña.

Kalabot sa pamahayag ni  Garcia,  si Osmeña miingon angay pangutan-on ang katawhan kun asa sila mas pabor sa daang moplete og P8 o P70 nga ang importante makaabot sa trabaho nga dili late.

Subling giklaro ni Osmeña dili siya supak sa Light Rail Transit (LRT) Project ug gani andam siya mosuporta apan kinahanglan dili wagtangon ang BRT project nga gawas nga aduna nay sistema duna na sab  kini pundo nga P16.9 Bilyones.

Si Dino sa iyang gihatag nga pamahayag miklaro nga iyang suportahan ang epektibong matang sa mass transit system. Matud niya ang BRT milampos sa ubang mga siyudad, apan kadtong mga siyudad lang nga giandam na sa sinugdanan pa lang alang sa BRT. Matud niya gusto sa mga Sugboanon og transparency  sa maong transaksyon ug posibleng nataligam-an lang kaniadto kaning mga problema kay karon pa nakita.

“I am recommending for a review and investigation,” matud pang Dino.

Sumala pa niya, posibleng masangit ang proyekto sa mga rekisitos sa “Economic Internal Rate of Return” ug “Financial Internal Rate of Return” human nga nisirit og kataas ang gastos sa pagbutang lang og road right of way.

“I don't have to convince people, this is a free country, let them decide. All I did was just to show facts and figures,” matud pa sa pamahayag ni Dino. (BANAT NEWS)