Bag-ong warden sa Talisay City Jail

CEBU, Philippines - Bag-o na ang warden sa Bureau of Jail Management and Penology (BJMP) sa Siyudad sa Talisay.

Ni-courtesy call si Supt. Gil Inopia kang Mayor Eduardo Gullas kagahapon ug gikuyogan siya ni Chief Insp. Dennis Aliño, kinsa nidumala sa city jail sulod sa duha ka buwan.

Kini human si Chief Insp. Josephus Jelianggao gihulipan tungod sa isyu nga adunay nakasulod nga mga kontrabando sa prisohan.

Si Aliño mobalik na sa iyang orihinal nga assignment isip chief legal officer sa ilang buhatan isip usa ka abogado.

Sumala pa ni Aliño nga angay bantayan ni Inopia ang mga piniriso nga padayon gihapon nga nagnegosyo og ginadiling drugas.

Gani sa una niyang buwan sa pagdumala sa Talisay City Jail, duna sila’y nasikop nga nisuway sa pagpalusot og ginadiling drugas. Lain nilang nasikop mao ang piniriso gikan sa mga kamot sa kapolisan ug buot na nga i-turnover sa ilang buhatan.

Si Inopia nagkanayon nga iyang tun-an ang tambag ni Aliño tungod kay ang pagpasulod sa mga kontrabando sa bilanggoan ang numero uno gyud nga isyu sa bisan asa nga prisohan.

(BANAT NEWS)