Imbentaryo sa balota nasugdan na

CEBU, Philippines - Gipahigayon na kagahapon ang pag-imbentaryo ug pagselyo sa mga ballot boxes sa 168 ka protested precincts sa election protest ni kanhi mayor Michael Rama.

Gipahigayon ang inventory ug sealing sa Senior Citizens Park sanglit sa maong lugar man gipahiluna ang mga container vans nga gisudlan sa mga ballot boxes.

Gisaksihan kini nila ni North District Election Officer Atty. Marchel Sarno, City Treasurer Tessie Camarillo ug mga representante nila ni Mayor Tomas Osmeña ug Rama.

Nagkanayon si Sarno ang proseso nga ilang gihimo kadtong mga protested nga mga balota i-segregate ug maoy dad-on sa Comelec warehouse didto sa kaulohan.

Gihulagway ni Sarno nga dili ra kuti ang ilang buhaton sanglit selyohan ra nila og usab ang mga ballot boxes dungan sa pasalig nga wala’y laing makaabli niini kondili ang mga hingtungdan ra nga mga tawo.

Ang mga nabahig nga contested ballots kuyogan og polis ug mga representante sa duha ka habig ug sa Comelec aron didto na sa kaulohan ipahigayon ang recounting. Gipasabot ni Sarno nalangay lang ang pagpahigayon kagahapon sa inventory ug sealing tungod kay nangita pa sila og bolt cutter kay ang yawe sa mga padlock dili naman magamit.

Gipaabot nga molanat og tulo ka adlaw ang pagpahigayon sa inventory ug sealing sa mga ballot. (BANAT NEWS)