Mga balota imbentaryuhon
CEBU, Philippines - Karong adlawa sugdan ang inventory ug sealing sa mga balota nga giprotestahan ni kanhi mayor Michael Rama human nga wala na sad kini mahinayon kagahapon nga maoy gikatakdang adlaw aron kini himoon.
Nagkanayon si Atty. Lionel Marco Castillano, Provincial Election Supervisor nga aduna’y problema sa forwarder nga gikuha sa habig sa Team Rama nga mao ang Sulpicio.
Dugang ni Castillano, atol sa ilang meeting sa kampo ni Rama mirekomendar kini nga ang serbisyo sa 2GO maoy kuhaon sa Team Rama sanglit mao man usab kini ang forwarder sa Commission on Elections (Comelec) apan nasuta nila nga na-contact na sa Team Rama ang Sulpicio.
Apan ang problema nisupak ang habig ni Mayor Tomas Osmeña tungod kay dili sigurado kun ang Sulpicio mahimong mopasakay og pasahero nga cargo ra sila ug kinahanglan nga duna’y magbantay sama sa watcher ug pulis alang sa seguridad.
Hinoon, nisugot ra ang mga abogado ni Rama nga 2GO maoy kargahan.
“Dili sure kung allowed ba mokarga og pasahero, di ba ang Sulpicio ron cargo na lang unya kung mokarga sila og pasahero illegal na. Naa baya’y watchers mokuyog, naay polis akong pakuyugon asa man ibutang mao to ilang objection nisugot raman pud dayon ang abogado ni Mike Rama nga 2GO ang kuhaon so nag-contact na sila sa 2GO,” matud ni Castillano.
Nagkanayon si Castillano nagkasabot na sila sa Team Rama nga han-ayon ang tanan nga mga gikinahanglan sama sa ground rules alang sa inventory ug sealing sa mga balota. Sa pasado alas 8 karong buntag sugdan na ang inventory ug sealing sa mga balota sanglit wala pa man sila masayod kun kanus-a moabot ang container sa 2GO maong nauyonan nga sugdan na lang kini. (BANAT NEWS)
- Latest
