ASEAN Meeting sa Bohol sugdan karon

CEBU, Philippines - Sugdan karong adlawa ang Asean Trade Ministers Meeting sa Probinsiya sa Bohol nga molungtad hangtud sa Biyernes.

Matud sa director sa Department of Trade and Industry sa Central Visayas, Asteria Caberte, nga andam na ang tanan alang sa kalihukan bisan sa nahitabo nga engkwentro tali sa tropa sa gobiyerno ug sa mga sakop sa Abu Sayyaf Group sa niaging semana.

Si Judy Gabato, ang officer-in-charge sa Department of Tourism-7, nagkanayon nga walay langyaw nga delegado nga nikanselar sa ilang partisipasyon sa tigum.

Ang mga delegado sa Brunei, Indonesia, Malaysia ug Pilipinas naabot na kagahapong adlawa sa Bohol, matud ni Gabato.

Gibana-bana nga adunay 200 ka langyaw nga delegado ang mangabot sa Bohol alang sa kalihukan kinsa mangabot karong adlawa sama sa gikan sa Cambodia, Laos, Myanmar, Singapore, Thailand ug Vietnam.

Hugot ang pagsalig sa DOT sa military ug kapolisan sa seguridad sa Central Visayas bisan pa sa travel ban sa Korean Embassy sa ilang mga residente.

Base sa record sa DOT-7, ang Koreans maoy labing daghang turista sa Sugbo nga niabot na sa 711,644 samtang sa Bohol niabot na og 39,229.

“We respect yung travel advisory ng Korea but yung ating security ay full alert na,” matud ni Police Regional Office-7 Director Noli Taliño.

Dul-an sa 5,000 ka polis lakip na ang mga barangay tanod ang gipakatap alang sa seguridad sa kalihukan sa Asean Trade Ministers Meeting. Giandam sab ang signal jammers kung may motumaw nga bati nga sitwasyon nunot sa target sa kapolisan nga zero incident rate sa Panglao, Bohol atol sa maong kalihukan.

Samtang nagtuo si acting Cebu City Mayor Edgardo Labella nga dili makaapekto sa turismo sa Sugbo ang special travel advisory sa Consulate of the Republic of Korea.

Giawhag hinoon ni Labella ang publiko ilabi na ang mga Koreans sa pag-report sa tinugyanan sa balaud kung may makita nga katingad-an sa ilang palibot.

Si Konsehal Dave Tumulak, chairman sa committee on public order and safety sa konseho sa Dakbayan sa Sugbo, niingon nga makaapektar ang advisory sa turismo sa Bohol apan dili molungtad og dugay tungod sa hugot nga seguridad.

Si Bise Gobernador Agnes Magpale, chairman sa committee on tourism sa Hunta Probinsiyal sa Sugbo, nagkanayon nga ang advisory dili ra makaapekto sa turismo sa Sugbo. Iyang gisanglitanan ang pagdeklarar sa Sugbo nga “2nd Friendliest Island in the Whole World.”

Matud ni Magpale nga kini nagpamatuod nga bisan sa hulga sa mga teroristang grupo nagpabiling hapsay ug aktibo ang turismo sa Sugbo.

“Cebu is safe,” matud ni Magpale. Mitchelle L. Palaubsanon, Camille L. Pateres, Decemay P. Padilla, Mary Cris A. Remata ug Pamela Faith D. Pogoy (BANAT NEWS)