TRO sa RH Law ipalibkas
CEBU, Philippines - Giawhag sa Commission on Population ang Korte Suprema nga libkason na ang temporary restraining order sa family planning ug ipatuman na ang Reproductive Health Law.
Si PopCom Executive Director, Dr. Juan Antonio Perez, nihimo sa maong panawagan isip pahaum sa pagsaulog sa Women’s Month diin ang kababayen-an gihatagan og kagahum sa pagpalig-on sa Magna Carta of Women.
Ang Magna Carta naghatag sa kababayen-an og access of information and services apil na ang RH services.
Niadtong Hunyo 2015 ang Korte Suprema niluwat sa TRO nga nagdili sa Department of Health sa pagpangapod-apod og contraceptive implants tungod sa pagtuo nga kini alang sa abortion.
Atol sa 888 News Forum sa Marco Polo Plaza kagahapon, si Perez nagkanayon ang kakuwang sa baratong contraceptives makaapektar sa maternal mortality sa nasud.
Matud niya nga kung kini mahitabo, mabutang sa peligro ang kahimtang sa panglawas sa publiko.
Ang PopCom nibanabana nga kapin sa 13.4 milyones ka kababayen-an sa nasud ang apektado sa TRO diin 6.1 milyones ang naggamitan og contraceptives ug 7.3 milyones ang nagkinahanglan og family planning measures.
Gibutyag ni Perez nga nanguha sila karon og usa ka milyon ka pirma aron pag-awhag sa Korte Suprema nga libkason na ang TRO.
“This Women’s Month, no gift is sweeter for the Filipinos, especially for the women who have long believed and fought for the law, than the resolution to lift the TRO on family planning,” dugang ni Perez. (BANAT NEWS)
- Latest