‘Floating bridge’ sa Santander-Dumaguete

CEBU, Philippines - Gitinguha ang pagbutang og “floating bridge” aron pagdugtong sa Santander, Cebu ug Dumaguete City, Negros Oriental tungod sa kalawom sa dagat nga labangon niini.

Si Kabayan Party-list Rep. Harry Roque sa iyang pagbisita sa Sugbo nibutyag nga nahinabi na niya ang usa ka European company nga maoy mohimo sa pagtuon sa pagbutang sa floating bridge nga mao unya ang labing una sa Pilipinas.

Kini human ang Department of Public Works and Highways giingong niatras sa pagtukod og hanging bridge tungod sa kakuwang sa teknolohiya nga haum sa kalawom sa dagat.

“This is just a wild idea pero kasi ako I never give up on a good idea kaysa mag-give na tayo at ang DPWH give up na kasi masyado daw malalim, let’s explore something else,” matud ni Roque.

Gipasalig ni Roque nga mangita siya og pundo alang sa feasibility study aron matuman ang proyekto.

“Susubukan ko pong mapunduhan yung feasibility study nang sa ganun matupad naman yung matagal nang ninanais ng mga taga Cebu at mga taga Dumaguete na magkaroon ng tulay between Cebu and Dumaguete,” matud ni Roque.

Nanghinaut si Roque nga mahuman ang feasibility study karong tuiga ug siya mismo ang moduso niini ngadto sa National Economic Development Authority.

Kanunay’ng magbisitahan si Roque sa Sugbo nunot sa iyang ibubo nga P200 milyones nga proyektong inprastraktura nga naglakip sa mga multi-purpose centers, school buildings, flood control projects, water system ug uban pa.

Kini isip usab pasalamat sa taga Sugbo ug Negros diin siya nakakuha og daku nga botos sa niaging eleksiyon.

Ang pagdugtong sa Cebu ug Negros kabahin kini sa planong Negros-Cebu-Bohol-Leyte (NECEBOLEY) Bridges nga gisugyot ngadto kang Presidente Rodrigo Duterte.

Si Presidential Adviser on Legislative Affairs ug pangulo sa Presidential Legislative Liaison Office, Secretary Adelino Sitoy, sayo pa nipahibawo nga ang maong plano anaa na kang DPWH Secretary Mark Villar.

Matud ni Sitoy nga sila si Gobernador Roel Degamo sa Negros Oriental, Hilario Davide III sa Cebu, Edgar Chato sa Bohol ug Damian Mercado sa Southern Leyte ang uyon na sa maong proyekto. (BANAT NEWS)