P3M nakuha sa ATM Skimming

CEBU, Philippines - Nipatim-aw sa buhatan ni Konsehal Dave Tumulak ang pipila ka biktima sa automated teller machine (ATM) skimming kinsa mga residente sa Dakbayan sa Sugbo.

Sila nitambong sa tigum nga gipatawag sa konsehal kauban sa hepe sa City Intelligence Branch sa Cebu City Police Office, Chief Inspector Christopher Navida ug Cebu Banker’s Club nga gipanguluhan ni Maximo Rey Eleccion.

Nasayran nga moabot na sa P3 milyones ang tanang kwarta nga nakuha sa maong modus diin ang labing daku moabot sa P600,000.

Ang CBC nipasalig sa mga biktima nga human sa imbestigasyon, taplan sila sa nakuha nga kwarta.

Nasabutan sab ang pagbutang og close circuit television (CCTV) camera sa mga ATM booths.

Nasabutan sab nga awhagon ang tanang bangko nga kung ang usa ka tawo mo-withdraw og P5,000 nga mopadala og mensahe sa depositor aron pagsuta kung siya ba ang nag-withdraw sa kwarta.

Ipasusi sab sa mga bangko matag oras kung wala bay skimming devices nga gipamutang sa mga ATM.

Ang mga biktima nakapangutana kung nganong hangtud karon ang mga bangko wala pa nakapakita sa dagway sa skimming devices aron sila mismo makaila niini.

Si Tumulak usa sa nabiktima human moabot sa P50,000 ang nakuha gikan sa iyang deposit nga dili siya ang nag-withdraw.

Matud ni Tumulak nga siya mismo ang mopasaka og legislative measures sa konseho sa Dakbayan sa Sugbo aron masulbad ang maong kaso.

Samtang gimanduan na sa director sa Police Regional Office-7 ang mga city ug provincial directors sa kapolisan sa rehiyon nga makig-alayon sa mga bank managers ug security managers aron masumpo ang grupo nga responsable sa ATM skimming.

Lakip sa kamanduan ni Chief Supt. Noli Taliño nga masubay sa mga bangko ang ilang mga ATM booths ug makapadala og mga technician aron masusi kung wala bay mga skimming devices nga gipangbutang.

Matud ni Taliño nga gawas sa mga bank ug security managers, gusto sab niya nga moapil ang mga tawo sa pagtabang sa maong problema.

Gipasabot ni Taliño nga ang mga polis igo lang magpatrolya sa mga dapit nga dunay mga bangko ug ATM booth.

Samtang si Senior Supt. Eric Noble, director sa Cebu Provincial Police Office, niingon nga iya na sab nahinabi ang hepe sa Naga City Police Station, Supt. Gregorio Gaslim, aron hatagan og pagtagad ang mga biktima  sa ilang lugar. (BANAT NEWS)