CCMC Admin suportado sa mga kawani

CEBU, Philippines - Magpahigayon og signature campaign ang Nursing Department sa Cebu City Medical Center isip suporta sa bag-ong palisiya ni Administrator, Atty. Rey Cris Panugaling.

Ubos sa bag-ong palisiya ni Panugaling, gipatas-an ang benepisyo nga maangkon sa mga kawani sa CCMC.

Tug-an ni Panugaling nga ang Nursing Department nga naglangkub sa 60 porsiyento sa mga kawani sa CCMC ang nidesider sa pagpahigayon og signature campaign.

Dugang pa ni Panugaling nga sa wala pa gipresentar ang bag-ong palisiya ngadto sa konseho, gikonsulta una ang tanang empleyedo.

Nasagmuyo si Panugaling sa pasangil nga gisagulan og pamolitika ang pagpangapod-apod og benepisyo sa tanang kawani.

Atol sa regular session sa konseho, gituki ang suwat reklamo kalabot sa dili patas nga benepisyo nga ihatag sa mga kawani.

Ang suwat wala’y pangalan apan niangkon sila nga sila mga kawani sa CCMC.

Hinuon nidesider ang konseho nga magpahigayon og executive session sunod semana aron pormal nga patubagon ang kadagkuan sa CCMC kalabot sa mao’ng alegasyon. (Sheriza Mae R. Uy/GMR)

John Yre ‘persona non grata’ na

Gideklarar sa konseho sa Dakbayan sa Talisay nga "persona non grata" si City Administrator John Yre de los Reyes gumikan sa giingong ka wala’y batasan isip usa ka opisyal sa gobiyerno.

Si Konsehal Aldin Diaz ang niduso og resolusyon uban ni Konsehal Danny Caballero diin ila’ng gihulagway nga sukad niadto’ng 2015 hangtud karon, ang anak ni Mayor Johnny de los Reyes ang nagsige na lang og binastos sa konseho pinaagi sa Facebook ug ingon man sa binayran nga program sa DyRC.

"Okey ra unta na’ng ginganlan ko niya og bayot kay basin naibog siya nako. Pero iya naman gud giapil ang ako’ng asawa nga puti kuno kaayo og nawong. Hasta ang ako’ng anak giingnan niya og pislat og ilong," matud ni Diaz.

Asoy pa niya nga wala’y problema kaniya kung siya sawayon sa iya’ng trabaho apan dili siya katugot nga hasta ang iya’ng pamilya ang apilon.

Samtang si John Yre pinaagi sa text message nisaysay nga ang gihimo sa konseho may kalabutan sa politika ug kini wala’y basehanan. Iya’ng gihulagway nga abuse of authority ang gihimo sa konseho.

Si Bise Mayor Romeo Villarante sa iya’ng bahin nagkanayon nga wala sila mahulga nga mopasaka og kaso si John Yre tungod kay nagbuhat lang sila sa ila’ng trabaho sa konseho. (BANAT NEWS)