Kahuot sa dagan sa trapiko gipaabot atol sa bar exam

CEBU, Philippines — Ang Cebu City government mopatuman og estrikto nga lakang karong weekend alang sa 2026 Bar Examinations diha sa University of San Jose-Recoletos Basak Campus.

Sirad-an ang outermost southbound lane sa N. Bacalso Avenue ug gamiton ang   examinee-only lane nga magsugod sa alas 2 sa kadlawon ngadto sa alas 7 sa gabii karong September 6, 9, ug 13.

Ipakatap sa maong mga adlaw ang mga police, traffic enforcers, ug disaster response units aron maoy magbantay sa posibleng paghuot sa dagan sa mga sakyanan ug alang sa seguridad.

Ang Cebu City Transportation Office (CCTO) mipahimangno sa katawhan nga makapaabot og temporary traffic slowdowns sa vicinity sa USJ-R-Basak campus atol sa pagpahigayon sa 2026 Bar Examinations.

Hugot usab ang gihimong security preparations sa Cebu City Police Office nga nag-andam sa pag deploy og kapin sa usa ka gatus ka nga polis, lakip ang mga miyembro sa SWAT, EOD, ug intelligence units atol sa mga adlaw sa examination.

Ang Anti-Noise Ordinance ug liquor ban sulod sa 100-meter radius sa USJ-R ang ipatuman usab gikan sa tungang gabii hangtud nga mahuman ang exam.

Ipa standby usab ang mga ambulansiya gikan sa Disaster Risk Reduction Office ug mga fire trucks gikan sa Bureau of Fire Protection.

Kahinumduman niadtong tuig 2022 gipatuman sa Supreme Court ang unang pag regionalized sa Bar Examinations ug apil ang Cebu City sa 28 ka testing centers nationwide.

Kining maong lakang gipatuman nonot sa nasinate nga pandemic ug gidayeg kini gumikan kay dili na mobyahe ang mga examinees sa Visayas ug Mindanao ngadto sa kaulohan.