Klase temporaryong gisuspenso gumikan sa delikadong kalidad sa hangin

CEBU, Philippines — Temporaryong gisuspenso ni Cebu City Mayor Nestor Archival, Sr. ang tanang face-to-face classes sa pampubliko ug pribadong tunghaan sa siyudad sugod sa alas 2:00 sa hapon kahagapon hangtud karong adlawa tungod sa delikadong kalidad sa hangin nga gidala sa transboundary haze gikan sa nagpadayong forest fires sa Kalimantan, Indonesia.

Base sa advisory sa Department of Environment and Natural Resources-Environmental Management Bureau (DENR-EMB)-7 niabot sa 208 ang Air Quality Index (AQI) sa Metro Cebu sa alas 11:00 sa buntag nga gi-classify nga “Acutely Unhealthy”.

Sa alas 3:00 sa hapon, nisaka pa ang AQI ngadto sa 215 diin sama gihapon ang klasipikasyon.

Ang kalidad sa hangin dili kini maayo alang sa mga tawo nga hubakon ug adunay sakit sa kasing-kasing ug baga.

Kinahanglan nga limitahan sa mga tawo ang mga kalihokan sa gawas, magpabilin sa sulod sa balay ug mopahuway, ang mga dili kinahanglan nga biyahe kinahanglan nga i-postpone ug ang paggamit sa mga sakyanan mahimong limitahan.

Matud ni Archival nga ang pagsuspenso sa klase gumikan padayon nga Habagat o Southwest Monsoon nga posibleng magpadayon sa pagdala sa haze padulong sa siyudad ug prayoridad karon sa siyudad nga mapanalipdan ang mga tinun-an, magtutudlo, trabahante ug ang tibuok tawo sa siyudad.

Bisan gisuspenso ang face-to-face classes magpadayon ang Modular Distance Learning (MDL), asynchronous classes ug ubang flexible learning modalities subay sa Department of Education Order No. 014, s. 2026.

Gawas sa pagsuspenso sa klase, gihangyo sab ni Archival ang mga pribadong kompanya, establisamento, institusyon ug opisina nga magpatuman og flexible work arrangements aron mapanalipdan ang ilang mga empleyado.

Lakip sa girekomenda ang work-from-home o telecommuting alang sa mga empleyado nga mahimo’ng magtrabaho sa layo, paghatag og N95 o KN95 masks sa mga outdoor workers, pagpatuman og shift rotations aron mamenosan ang taas nga exposure sa gawas, paghatag og espesyal nga konsiderasyon sa mga mabdos, senior citizens ug adunay respiratory o cardiovascular nga kondisyon ug pagsiguro nga adunay igo nga air filtration systems pinaagi sa pagsira sa mga bintana ug pultahan.

Subay niini, nipahibalo usab sa pagsuspenso sa klase ang mga dakbayan sa Talisay ug Carcar.

 Si Talisay City Mayor Gerald Anthony “Samsam” Gullas, Jr.nipahibalo usab kagahapon nga suspendido ang face-to-face classes sa tanang public schools sa siyudad karong adlawa human sa koordinasyon sa Department of Education (DepEd) ug City Disaster Risk Reduction and Management Office (CDRRMO).

Samtang, ang Talisay City College ug mga pribadong eskwelahan nagdepende kini sa desisyon sa ilang tagsa-tagsa ka administrators.

Sa Carcar City, gisuspenso usab ang face-to-face classes sa tanang public schools karong adlawa subay sa koordinasyon sa DepEd ug CDRRMO.

Ang desisyon alang sa mga private schools nagdepende usab sa ilang school administrators.

Si Gobernador Pamela Baricuatro niawhag sa mga adunay respiratory problems nga magmatngon ug mogamit og facemask kung kinahanglang mogawas. (BANAT NEWS)