Usa ka lider sa aktibista gidakop

CEBU, Philippines —Giaresto ang usa ka lider-aktibista nga gilista isip No. 1 most wanted person sa Cebu Province tungod sa outstanding warrant of arrest sa kasong attempted murder sa Barangay Guadalupe, Cebu City, niadtong Lunes sa hapon, Agosto 31, 2026.

Giila ang dinakpan nga si John Tabada Ruiz, 54, vice president sa Makabayan Visayas ug giila usab sa laing report isip Central Visayas coordinator sa progresibong grupo nga Bayan Muna. Nadakpan siya sa mga personnel sa Criminal Investigation and Detection Group-Cebu City Field Unit mga alas 5:56 sa hapon.

Ang warrant batok kang Ruiz gi-isyu ni Judge Walter Zorilla sa Regional Trial Court Branch 55 sa Himamaylan City, Negros Occidental, ug adunay girekomendar nga pyansa nga P120,000.

Giingong nasikop si Ruiz human siya nakauli gikan sa usa ka rally sa University of the Philippines Cebu nga gihimo isip pag-obserbar sa National Heroes Day.

Mitabang sa pagpatuman sa warrant ang mga personnel sa CIDG-7 Regional Special Operation Team, Regional Intelligence Unit 7, Provincial Intelligence Team of Negros Occidental ug Guadalupe Police Station. Wala misukol si Ruiz sa dihang giserbisyuhan siya sa warrant ug miingon nga andam siyang moatubang sa kaso sa korte.

Apan gihimakak ni Ruiz ang iyang pagkalambigit sa bisan unsang armadong engkwentro ug miingon nga hinimo-himo lamang ang kaso batok kaniya ug gituyo aron pahilumon ang mga aktibista.

Gikan sa attempted murder case nga gi-file batok kang Ruiz sa Negros Occidental ang maong warrant, gipatuman sa Cebu City human siya malista isip wanted person.

Sa ulahi, gibuhian si Ruiz human makapiyansa og P120,000, sumala sa Karapatan Central Visayas. Matod sa grupo, mitabang ang iyang mga supporters sa pagpangita og pondo alang sa piyansa ug legal nga depensa.

Gikuwestiyon usab sa Karapatan Central Visayas ang paggamit sa mga kasong kriminal batok sa mga aktibista, nga matod niini mahimong gamiton kini aron hadlukon ug pahilumon ang mga kritiko.

Nag-ingon ang grupo nga magpadayon kini sa pagsuporta kang Ruiz ug pagpangayo og accountability sa giingon niini nga criminalization of dissent. (BANAT NEWS)