CCPO: Pagtabang sa komunidad epektibo batok krimen

CEBU, Philippines — Gilusad sa Cebu City Police Office (CCPO) ang 32nd National Crime Prevention Week pinaagi sa opening ceremony nga gipahigayon sa CCPO Parade Ground sa Cebu City niadtong Martes, Septiyembre 1, 2026.

Mitambong sa kalihokan ang mga personnel sa kapulisan, mga opisyal sa gobyerno, partner agencies, ug mga stakeholders aron ipasiugda ang kahinungdanon sa aktibong partisipasyon sa komunidad sa pagpugong sa krimen.

Gisandigan karong tuiga ang tema nga, “Strengthening Civilian Oversight and Collective Action for Safer Communities.”

Gidawat ni CCPO Acting City Director PCol.  Ricky C. Sumalde ang mga mitambong ug nagpasalamat sa mga partner agencies ug stakeholders tungod sa ilang padayong suporta sa mga paningkamot alang sa kalinaw ug kahapsay sa siyudad.

Sa iyang mensahe, gipasiugda ni Sumalde nga ang pagmentinar sa kaluwasan sa komunidad nagkinahanglan sa aktibong partisipasyon ug kooperasyon sa tanan, dili lamang sa kapulisan.

Si Atty. Ronald A. Luib Jr., Attorney V/City Officer for Cebu City North sa National Police Commission (NAPOLCOM) Region 7, mipresentar sa rationale sa pagsaulog ug mipasiugda sa papel sa mga sibilyan sa accountability ug oversight sa law enforcement.

“Very important gyud ang community participation in crime prevention,” matud ni Luib.

Matud pa niya, ang pagpugong sa krimen usa ka responsibilidad nga gipaambit sa mga institusyon sa gobyerno, kapulisan, ug komunidad.

Kabahin sa programa ang “Pagtataya ng Mamamayan sa Paghahadlang sa Krimen o Pito Laban sa Krimen,” nga giapilan sa mga interns gikan sa University of Cebu-Banilad.

Gipakita sa maong kalihokan ang papel sa mga lungsoranon ug kabatan-onan sa pagpataas sa kahibalo ug pag-apil sa mga paningkamot sa pagpugong sa krimen.

Ang 32nd National Crime Prevention Week gisaulog matag Septiyembre 1 hangtod 7 aron mapataas ang kahibalo sa publiko ug mapalambo ang partisipasyon sa komunidad sa pagpugong sa krimen.—  IBM BANAT NEWS