Duha ka polis nga drug protectors nailhan

CEBU, Philippines – Duha ka mga pulis ang gikatahong tigdawatan og kwarta gikan sa gidudahang drug pusher sa lungsod sa Camotes sumala pa sa direktor sa kapulisan sa Cebu Provincial Police Office, Senior Superintendent Clifford Gairanod nga nahinabi sa mga tigbalita.

Matud pa ni Gairanod nga usa ka PNCO ug usa ka police official nga nadestino sa isla sa Camotes ang nalambigit sa maong alegasyon ug nakahibalo na niini ang Police Regional Office  7.

Si Gairanod miingon nga mohimo sila og makuting imbestigasyon batok sa mga pulis. Matud pa niguwa ang pangalan sa duha human sa pagpangronda sa Provincial Intelligence Branch sayo niining bulana nga miresulta sa pagkasikop sa usa ka maestra nga si Maria Jocelyn Arquillano ug iyang pamilya diha sa Brgy. Campo, San Francisco, Isla sa Camotes.

Atol sa maong operasyon lakip sa narekober sa kapulisan ang mga resibo sa mga money remittance center ug nakabutang ang pangalan sa duha ka mga pulis nga giingong tag P5mil  ang madawat sa kada usa sa maong mga polis.

“Mga resibo apil man na sa mga ebidensya, nakita kasi dun ang pangalan niya, opisyal ug PNCO,” matud pa ni Gairanod.

Si Gairanod miingon nga dugay ra unta niya planong ipa-relieve ang duha apan gumikan sa dagkong kalihokan sama sa nakalabay nga Sinulog hinungdan nga kini nalangay.

Giangkon ni Gairanod nga misulay na og pangayo og tabang kaniya ang maong pulis apan gusto niya sila nga mapaubos sa imbestigasyon.

Samtang usa sa tan-awon karon sa bag-ong direktor sa CPPO kadtong mga lugar nga duna’y mga notadong drug pushers  malagmit gamiton sa mga politiko karong umaabot nga eleksyon.

Kini human nasuta sa kapulisan nga kadtong nakasibat sa operasyon sa PIB diha sa dakbayan sa Naga nga si Joel Gentica nalambigit usab diay sa mga wala pa masulbad nga patay sa Naga ug San Fernando.

Nagduda si Gairanod nga kining mga drug personalities gamiton usab sa mga politiko isip mga goons. – /EIM) (BANAT NEWS)