Konseho mouli sa annual budget ni JVR

CEBU, Philippines – Nahukman sa mga sakop sa Talisay City Council nga ilang ibalik ngadto ni Mayor Johnny V. De los Reyes ang giduso niini nga Executive Budget alang sa tuig 2016 nga kantidad og kapin sa P823 milyones.

Kini human nasuta sa mga konsehal nga ang mayor, pinaagi sa Local Finance Committee, wala mosukip sa budget alang sa Legislative Assistance Fund (LAF) nga para sa kabarangayan.

Si Bise Mayor Romeo Villarante nga maoy presiding officer sa konseho nagkanayon nga wala sila makatuki sa annual budget kagahapon atol sa ilang regular session kay ipatawag pa nila ang mga sakop sa Local Finance Committee ug pipila ka department heads.

Sigon pa ni Villarante nga gustong masayod ang konseho sa financial status sa Talisay ug kun ngano nga si JVR nangayo og ingon niini kadako nga budget. Nasuta nila ni Villarante nga may gipangsukip gihapon nga items alang sa suweldo sa mga “job order” workers.

Matud sa bise mayor nga sa giduso nga 2016 Annual Budget walay gigahin alang sa LAF nga mao unta'y itabang sa mga konsehal ngadto sa kabarangayan.

Nagkanayon si Villarante nga kadaghanan sa mga konsehal sa Talisay supak nga wad-on ang LAF mao nga iuli nila ngadto sa mayor ang giduso nga Annual Budget aron isukip niini ang gahin alang sa ilang LAF. – /RUB) (BANAT NEWS)