Ginang gipusil patay sa Talisay
CEBU, Philippines – Usa ka ginang ang gipusil patay sa wa mailhing mamumuno diha sa Sitio Salvador, Brgy. Tanke, Dakbayan sa Talisay niadtong Lunes sa gabii. Ang biktima mao si Elizabeth Reyes, 42, nagpuyo sa nahisgutang lugar.
Matud pa ni Senior Police Officer 1 Mikie Espina sa Talisay City Police Station, nag-inusarang naglakaw sa dalan ang biktima sa dihang kini gipusil sa wa mailhing tawo. Naigo sa iyang wala nga bahin sa iyang nawong ang biktima hinungdan sa iyang pagkahagba, samtang ang suspek yanong nilakaw palayo.
Ang biktima daling gidala sa Talisay City District Hospital apan gibalhin sa Don Vicente Sotto Memorial Medical Center diin matud pang Espina nakabsan kini sa kinabuhi.
Asoy pa ni Espina nga ang biktima panglabada lamang ug sugo-sugoon ang panginabuhian , apan siya naanad nga kubrahon daan ang kwarta una siya molihok.
Si Espina nibutyag nga basin og adunay nadawat nga kuwarta ang biktima ug wa mahimo ang gipatrabaho, apan sa pagkakaron di pa sila kombinsido nga paigo kini nga rason aron patyon ang ginang. – /EIM) (BANAT NEWS)
- Latest
