Preparasyon sa 51st IEC hapit na mahuman

CEBU, Philippines – Andam na ang tanan alang sa 51st International Eucharistic Congress 2016 matud pa ni Archbishop Jose Palma nga mahitabo sa buwan sa Enero sunod tuig.

Ang Archdiocese of Cebu kinsa maoy host sa kalihukan  ug anaa na sila sa “finishing touches” sa preparasyon ug han-ay na ang tanan.

Ang hangyo na lang sa Simbahan ngadto sa katawhan mao ang pag-ampo nga mahimong malinawon, mabulukon ug labaw sa tanan mahinumdoman ang kanindot sa maong kalihukan.

Panghinaot ni Palma kadto unyang mga tawo nga motambong sa kalihukan makaingon nga “worth it” ang ilang pag-apil sa IEC 2016 tungod kay aduna sila mga nakat-unan sa nagkadaiyang kalihukan sa IEC.

Gipahibalo usab ni Palma nga gamay na lang ang kuwang aron makab-ot nila ang ilang gitinguhang budget alang sa IEC.

Nagtuo si Palma makab-ot na nila ang ilang target nga 15 mil ka mga tawo nga motambong sa IEC 2016.

Niadtong miaging semana migawas sa social networking site nga Facebook ang listahan matud pa sa mga prime ministers nga giingong motambong sa kalihukan.

Dihang gipangutana si Palma labot niini wala siya mohimakak apan wa usab mokompirmar bahin niini kay iyaha una kining klaruhon.

Matud niya, kun dunay mga dagkong opisyal sa ubang nasud nga manambong personal nila kining kapasidad ug way labot ang ilang estado.

Gihimug-atan usab niini nga apil sa kalihukan sa IEC ang pag-atiman sa mga kabus ilabi na kadtong mga libudsuroy aron mabati nila nga apil sa maong kalihukan. – /EIM) (BANAT NEWS)