Sakop sa PAF gipusil patay

CEBU, Philippines – Usa ka sakop sa Philippine Air Force ang gipusil patay sa duha ka wala mailhing lalaki nagsakay og motorsiklo sa Sitio Lower Matumbo, Barangay Pusok dakbayan sa Lapu-Lapu sa miaging Martes sa hapon.

Matud sa kapolisan ang biktima nailhan sa pangan nga Joel Cuevas, 38 anyos , usa ka Aircraft Maintenance Specialist sa PAF ug residente sa maong dapit, siya nakaangkon og daghang samad pinusilan sa lawas.

Sa inisyal nga imbestigasyon ni Police Officer 3 Jerson Alparito sa Lapu-Lapu City Police Office- Homicide Section, si Cuevas gikan naghatud sa asawa ug anak niini didto sa ferry terminal didto sa Muelle Osmeña Wharf, Barangay Poblacion.

Sa dihang minaog si Cuevas sa iyahang motorsiklo padung na unta sa ilang balay, usa sa mga suspetsado ang mipusil sa biktima, hinungdan nga namatay kini diha dayon.

Matud sa polis, posibleng gisundan sa mga suspetsado si Cuevas samtang nagbiyahe balik sa panimalay niini.

Lima ka kabhang sa bala sa .45 kalibre ang nakuha sa crime scene. Sa pagkakaron, wa pa matino sa kapolisan kung unsay motibo sa mga mamumuno. – /EIM) (BANAT NEWS)