Anak sa maestra nag-wild gipadakop

CEBU, Philippines – Gidakop sa kapolisan ang anak og maestra nga nag-wild ug gireklamo nga nanion og kutsilyo sa iyang inahan didto sa Barangay Poblacion, Compostela kaniadtong Biyernes sa gabii.

Si Neil Joseph Galon, 24, nasakmitan sa mga polis og kutsilyo human nga ang inahan nga si Agnes, 51, mireklamo sa kapolisan nga siya gihulga sa iyang anak.

Si PO3 Michael Magallon, desk officer sa Compostela Police Station, miingon nga midangop sa ilang buhatan ang maestra ug misugid nga nagmaoy ang iyang anak.

Matud pa nga nag-wild ang anak sa maestra ug sa ngadto-ngadto ang iya nang inahan maoy gitionan og kutsilyo.

Tungod sa kakuyaw sa inahan, nagdali kini nga migawas sa ilang balay ug midangop sa kapolisan nga miresponde ‘sab dayon sa balay sa maestra ug gidakop ang anak kay naabtan pa nga nagbitbit og kutsilyo.

Ang suspek gidala sa police station ug gitanggong samtang giandaman pa og kaso nga grave threat kun dili kini mapasaylo sa iyang inahan. – /RUB) (BANAT NEWS)