Pagbaligya sa e-trike ipahunong

CEBU, Philippines – Giawhag sa konseho sa dakbayan sa Talisay ang nagbaligya sa electronic tricycles nga hunungon una ang ila’ng pagpamaligya samtang wala pa mausab ang ordinansa sa paghatag og prangkisa sa mga traysikol.

Kini human nipatim-aw sa hawanan sa konseho ang mga opisyal sa Racal Motors kagahapon atol sa session.

Hinuon si Atty. Joe Kenneth Arbas, representante sa kompaniya, nagkanayon nga unta sila tabangan sa konseho aron makakuha og prangkisa ang mga tawo nga mopalit og e-trike ug mamasahero.

Si Bise Mayor Romeo Villarante nipasabot nga ila’ng gituki ang reklamo sa mga traysikol drayber nga sila naalkansi tungod sa e-trike nga gihulagway nga kuwang og mga papales.

Matud ni Villarante nga ilegal gyud ang e-tricycle kung kini wala’y rehistro sa Land Transportation Office (LTO) ug dili kini makakuha og prangkisa kun tumong nila ang pagpamasahero.

Si Konsehal Val Ylanan kinsa tsirman sa committee on transportation ug pangulo sa CT-TODA niingon nga kung makita nga maayo ang e-trike nga giingong environment-friendly, hayan siya morekomendar nga ilisan ang mga motorsiklo.

Apan si Villarante niklaro nga hangtud dili mausab ang ila’ng ordinansa labot sa prangkisa sa mga traysikol, mas maayo’ng hunungon una sa Racal ang pagpamaligya kung kini himuong pasaheroan.

Sa pagkakaron ang legal nga traysikol nga nagdagan sa Talisay nga adunay prangkisa moabot sa 1,805 ug kini wala pa’y labot sa nagdagan nga ilegal nga wala’y prangkisa.

Si Villarante wala’y supak sa e-trike tungod kay makaayo kini sa kinaiyahan apan sa pagkakaron nga kini ilegal pa, dili una dugangan ang mga traysikol nga nagdagan sa Talisay. – /GMR) (BANAT NEWS)