Samsam nadismaya ni Davide
CEBU, Philippines – Giangkon ni Kongresista Gerald Anthony "Samsam" Gullas Jr. sa una’ng distrito nga nasakitan siya sa gibuhat ni Gobernador Hilario Davide III sa paghatag og Certificate of Nomination and Acceptance (CONA) sa mga kandidato sa pagka-mayor nga ila’ng atbang sa Alayon Party.
Matud ni Gullas nga siya nakalitan sa paghatag ni Davide og CONA sa Liberal Party ngadto sa kandidato kontra sa iya’ng mga mayor.
Si Gullas ang niduso sa iya’ng Certificate of Candidacy (COC) ubos sa Nacionalista Party-Alayon apan nipadayag nga mosuporta ni Mar Roxas pagka-presidente ug ni Davide bugti sa hangyo nga dili tagaan og CONA sa LP ang kontra sa iya’ng mga mayor.
Niingon si Gullas nga iya’ng konsultahon ang iya’ng mga mayor kun unsa ang ila’ng buhaton.
Apan bisan sa maon’g hitabo, si Gullas mosuporta gihapon sa gobernador ug ila’ng tukion kun unsa sab ang habig sa iya’ng mga mayor. Usa sa mga opisyal nga dili magpaila nagkanayon nga daw nagsalig ang gobernador kay kini nakadaug bisan wala sila nisuporta sa eleksiyon sa 2013.
Asoy pa niya nga makaluluoy sila tungod kay gibaliwala lang sila sa gobernador. Hinuon maningkamut gihapon sila aron nga modaug batok sa ila’ng mga kaatbang.
Nasayran nga duha na karon ka mga lig-ong lider nga sakop sa LP niadtong 2013 elections ang wala na kang Davide usa niini si Mayor Antonio Canoy sa San Fernando kinsa sakop na karon sa Nationalist Peoples Coalition (NPC) ug Bise Mayor Romeo Villarante sa dakbayan sa Talisay nga sakop na sab sa NPC kinsa niklaro na nga adto siya mopaluyo ni Atty. Winston Garcia sa pagka-gobernador.
Lakip sa gihatagan og CONA mao si Talisay City Mayor Johnny Delos Reyes atbang sa apohan ni Gullas nga si kanhi kongresista Eduardo Gullas apan wala kini nila igsapayan sanglit ang mayor man ang incumbent. – /GMR) (BANAT NEWS)
- Latest
