Bana gialarma, asawa ang napriso
CEBU, Philippines - Napriso na hinuon ang usa ka asawa nga nipugong sa kapolisan nga sikopon ang iya’ng bana nga gialarma nga nagpabuto og armas sa niagi’ng gabii sa Pulpogan, Consolacion.
Ang napriso giila nga si Susana Capangpangan, 49, asawa ni Renato Capangpangan.
Sumala pa ni Senior Inspector Wilson Abot, hepe sa Consolacion Police Station, nga mitubag sila og alarma tungod kay may nitawag nga usa ka Bern ang nagpabuto sa iya’ng armas. Matud pa ni Abot nga sa pag-abot nila sa lugar, nakit-an nila ang reklamante nga si Emma Lacio, 32, ug nitudlo sa suspek.
Sa pag-adto nila dapit sa balay sa magtiayon, nakit-an nila si Bern nga nagkupot sa armas ug nidagan sulod sa ila’ng balay. Ila kini’ng gitawag apan nisutoy og dagan hinungdan nga gisulod nila kini sa balay.
Apan ang asawa mao’y niali sa mga polis ug gani matud pa ni Abot nga nagisi ang uniporme sa usa niya ka sakop.
Tungod niini naka-ipsot ang suspek hinungdan nga gidakop nila ang asawa.
Matud ni Abot nga si Renato dili pa lang dugay nakagawas sa prisohan human nipiyansa sa kaso’ng paghupot og ginadili’ng drugas ug illegal possession of firearms.
Pasakaan gihapon og kaso ang suspek og alarm and scandal samtang ang iya’ng asawa pasakaan og kasong resistance and disobedience to a person in authority or the agents of such person. (BANAT NEWS)
- Latest
