Nadugta nga lawas napalgan
CEBU, Philippines - Nakaplagan sa mga residente ang usa ka patay nga lawas sa usa ka batan-ong lalaki nga nagsugod na og kadugta sa pangpang sa Sitio Tagaytay, Brgy. Can-asojan sa dakbayan sa Carcar.
Wa pa matino sa kapolisan kun kinsa ang maong lalaki sanglit nagsugod na kini og kadugta.
Si Senior Police Officer 2 Jurame Tanudtanud, desk officer sa Carcar City Police Station nga nahinabi sa Banat News miingon dunay nipahibalo kanila bahin sa patay’ng lawas diha sa maong dapit.
Wa pa matino kun unsay hinungdan sa kamatayon niini, apan usa ka residente sa maong lugar nga si Francisco Saraum, 66, mibutyag sa kapolisan nga niadtong Martes sa gabii nakadungog siya og tulo ka sagunson nga buto sa armas.
Apan wala lang nila to panumbalinga kay wala may kasikas niadtong higayona.
Ang lawas sa lalaki gihipos karon sa St. Francis Funeral Homes alang sa mga kabanay nga mangita niini. (BANAT NEWS)
- Latest
