Kapin P600 mil shabu nasakmit

CEBU, Philippines – Lima ka mga tawo ang nasikop nga naglakip sa kapuyo sa target sa kapulisan  sa buy-bust operation diha sa Sitio Lawis, Brgy. Luray II sa dakbayan sa Toledosa nakalabay nga gabii.

Apan ang target sa mga polis nga si Dennis “Tele” Lapa ang nakaikyas dihang nakabantay kining  giposasan sa mga polis ang iyang kapuyo nga si Jessica Huruela, 30.

Lakip sa nadakpan mao sila si Apol Carnice, 28, Ejerson Edoloverio, 32, Romeo Tomarong, 28 ug Rolando Macapaz, 36, pulos giingong nasakpan nga nag-repack og shabu.

Ang grupo ni Inspector Jovito Labra, deputy chief sa Toledo City Police mironda sa balay ni Lapa human nakapalit og gituohang shabu ang ilang asset sa kantidad nga P200.

Sulod sa gamay nga lawak nasakpan sa kapulisan ang mga dinakpan nga nagtakos sa mga shabu ug wala na nakalihok pagsulod sa mga polis. Miabot sa 55 gramos nga shabu ang nasakmit sa kapulisan nga mikantidad og P605 mil. Sa laing bahin, nasikop sa kapolisan sa Consolacion diha sa Brgy. Polpogan sila si  Reymond Caingcoy, 43, Jemed  Abalos, 31, Rino Puno, 48 ug Ranilo Hierbito, 33, pulos nagpuyo sa maong dapit.

Target sa buy-bust operation si Caingcoy human sila nakadawat og mga report nga namaligya kini og drugas sa maong dapit nga nakompirmar usab sa ilang pagpaniid.

Gidakop dayon si Caingcoy human nitunol og bale og P200 nga shabu gikan sa poseur buyer sa kapolisan, ug sa pagsusi sa iyang balay naabtan ang laing tulo nga sa pagrekisa nakuhan og lain pang upat ka paketeng shabu ug mga drug paraphernalia. – /EIM) (BANAT NEWS)