Dumpit ipabalhin sa munti’

CEBU, Philippines - Gimando sa korte nga ibalhin na ngadto sa New Bilibid Prison sa Muntinlupa City gikan sa Cebu City Jail si kanhi SPO1 Adonis Dumpit.

Sa usa ka pahinang kamandoan, si Regional Trial Court Judge Ester Veloso sa Branch 6 mipagawas sa commitment order ni Dumpit niadtong Marso 18, 2015.

Usa sa mga abogado ni Dumpit nga si Atty. Benjamin Militar miangkon nga nakadungog siya nga adunay kamandoan ang korte niini apan wala pa siya makadawat og kopya.

Si Dumpit unang gipasakaan og kasong murder apan gipaubsan kini ni Veloso  ngadto sa homicide tungod sa kakuwang og ebidensya aron maestablisar nga dunay intensyon si Dumpit nga patyon si Ronron Go.

Si Go gipasanginlang notoryos nga tulisan sa maong dapit apan kini gihimakak sa iyang inahan. Nahitabo ang pagpamusil niadtong Disyembre 14, 2004 sa Sitio Sampaguita, Villagonzalo II, Barangay Tejero, Cebu City diin usab magpuyo si Dumpit ug si Go. Si Dumpit gisentensyahan ni Veloso nga mabilanggo og unom ngadto sa siyam ka tuig ug upat ka buwan ug pabayron og P50,000 isip danyos sa pamilyang Go.

Unang gikasohan si Dumpit diha sa Deputy Ombudsman for the Military and Other Law Enforcement Office niadtong 2006 ug didto nakita nga dunay intensyon si Dumpit nga patyon si Go tungod kay wala kini armas sa pagkahitabo.

Apan si Dumpit mihimakak niini ug miingon nga napugos siya pagpabuto sa iyang armas human siya giunhan og pabuto ni Go ug sa kauban niini.

Base sa tubag ni Dumpit sa kaso, igo ra siya miresponde human mangayo kaniya og tabang si Kimberly Corro kauban ang inahan nga ang iyang kwintas gilabni ni Go sud sa jeep ug gitiunan siya niini og pusil.  Ang kampo ni Dumpit ni-file og motion for reconsideration apan gi-deny kini ni Veloso niadtong Enero 12, 2015.

Si Dumpit upat na ka tuig nga napriso karon sa CCJ. (BANAT NEWS)