Langub gihimo’ng suyopanan

CEBU, Philippines - Nasakmitan og 12 ka X-rated nga CD ang usa sa mga pushers nga nasikop sa managlahi’ng buy- bust operations sa tulo ka barangay sa dakbayan sa Lapu-Lapu sa niaging Huwebes.

Si Ricky Fernandez, 32, taga sitio Looc, Maribago ang nakuhaan sab og 23 ka putos sa ilegal nga drugas.

Si Senior Inspector Verniño Noserale, hepe sa City Intelligence Branch ug City Anti-Illegal Drugs Special Operations Task Group, nagkanayun nga ila’ng natumbok si Fernandez sa kabatuan ug kasagbutan nga adunay gamay’ng langub sa nahisgutang lugar.

Gituohan nga sa langub mopuwesto og suyop ang suspek diin gibana-bana nga masulod ang unom ka tawo.

Adunay duha ka lalaki nga nailhan sa pangan nga Reynan ug Jr. ang kauban ni Fernandez apan nakaikyas.

Laing suspek nga si Sabiniano Dayondon, 33, nga taga sitio Malingin, Punta Engaño ang gidakop sab sa kapolisan.

Matud sa hepe sa Mactan Police Station 2, Senior Inspector Mercedarios Balabat, nga nasakmit gikan sa dinakpan ang 11 ka putos sa shabu ug usa ka kalibre .45 nga armas.

Sayo sa niaging hapon sa Huwebes, nadakpan sab sa Pusok Police Station 5 si Reynante Cañete, 34, taga sitio Kulo, Punta Engaño.

Si Senior Inspector Alden Zambrano nagkanayun nga nakuhaan og duha ka pakete sa shabu si Cañete sa sitio Saac, barangay Buaya.

Natanggong sa Lapu-Lapu City detention cell ang tulo ka suspek nga pasakaan sa tukma’ng kaso. (Christell Fatima M. Tudtud/GMR)(BANAT NEWS)