City Hall motabang og bayad sa graduation
CEBU, Philippines- Makapahimulos ang 26,050 ka mga elementarya ug high school graduating students sa tanang pampublikong eskuylahan sa dakbayan sa Sugbo sa bag-ong ordinansa sa siyudad.
Kini mao ang paghatag kanila og P150 nga graduation subsidy matag estudyante. Kini ang City Ordinance 2412 nga giduso ni Konsehal Alvin Dizon sa konseho sa dakbayan.
Sigon pa ni Dizon, tumong niini nga mamenusan ang gastos sa mga ginikanan kada graduation.
Ang siyudad sa Sugbo mopagawas og P3.7 milyones isip graduation subsidy.
Sa karong umaabot nga graduation day, adunay 108 ka mga public elementary ug secondary schools sa siyudad ang nagpalista sa Local School Board nga gustong mopahimulos sa maong subsidy.
Matud ni Dizon nga iya nang isumiter karong Miyerkules ang memorandum of agreement sa konseho aron hatagan og authorization si Mayor Michael Rama ug ang Department of Education Cebu City Division nga mopirma sa maong kasabotan.
Planong ipagawas ang graduation subsidy sa ikatulong semana sa buwan sa Marso nga maoy sagad nga closing ceremony sa mga publikong eskuylahan. (BANAT NEWS)
- Latest
