Ipatawag ang stakeholders sa CSBT
CEBU, Philippines - Si Gobernador Hilario Davide III nagkanayon nga posibleng wala kaayo masabti sa mga bus ug mini-bus operator ang kabahin sa pagpaubos sa Public-Private Partnership sa Cebu South Bus Terminal (CSBT).
Gipasabot ni Davide nga ang CSBT iyaha sa probinsiya apan ipadumala kini sa pribado. Ang maong plano rekomendasyon kini sa Economic Enterprise Council (EEC) sa Kapitolyo.
Matud sa gobernador nga diskusyonan pa kini ug ang tanang stakeholders konsultahon usab ilabi na kalabot sa terminal fees ug uban pa.
Sumala pa sa gobernador nga sayo ra kaayo ang mga espekulasyon sa bus ug mini-bus operators tungod kay duna pa unya’y ipahigayon nga diskusyon.
Sa milabay’ng adlaw si Julito Flores, presidente sa Cebu South Mini Bus Operators Association mipahibawo nga mopahigayon sila og rally kung ipadayon sa EEC ang ilang sugyot alang sa privatization sa CSBT.
Ang grupo nabalaka nga motaas ang P5 nga terminal fee sa CSBT kung ma-privatized na kini.
Ang bus ug mini-bus operators nagplano sa pagtukod og kooperatiba nga maoy modumala sa terminal. (BANAT NEWS)
- Latest
