Police official ‘supplier’ og shabu sa Minglanilla

CEBU, Philippines – Gihagit karon sa hepe sa Minglanilla Police ang publiko nga itug-an sa ilang buhatan kung kinsa nga police official ug usa ka non-commission officer nga gikatahong supplier ug protektor sa drugas sa ilang lugar aron ma-imbestigaran ug matangtang sa trabaho.

Kini maoy gibuhiang hagit ug panawagan ni Chief Inspector Richard Gadingan human sa gihimo nga drug raid operation sa National Bureau of Investigation (NBI) sa Ward 2 sa maong lungsod.

Ang maong pagronda miresulta sa pagkasikop sa kapin sa 20 ka tawo ug pagkasakmit og dul-an  P200 mil nga kantidad sa shabu kagahapon sa hapon.

Nagpasalamat si Gadingan sa gihimo sa NBI sa pagtabang kanila sa pagsumpo sa ilegal nga drugas apan mas maayo ‘sab nga ilang mahibaw-an kung kinsa nga polis ang giingong protektor ug supplier sa drugas sa maong lugar.

“Ug naa ma’y mga allegations nga naa’y mga personnel nga involved, they can name it and file a case, pwede sad nga mo-coordinate sila namo, at least malipay ‘sab mi (nga) makuha kuhaan ang problema nato sa Minglanilla,” pasabot pa ni Gadingan.

Sumala pa sa opisyal wala kini na-monitor nga dunay iyang sakop nga nalambigit sa ilegal nga kahihokan sukad kini milingkod  isip hepe sa maong lungsod.

“Mao ra na ang among gihangyo nga ilang nganlan kung kinsa, kami isip hepe sakit baya namo nga alegaran mo nga ingon anah, di ba?  Wala na gani ta’y uli-uli sa atong pamilya tungod sa atong trabaho,” sumala pa ni Gadingan.

Ang  hepe sa Provincial Intelligence Branch (PIB) sa Cebu Provincial Police Office, nga si Supt. Rodolfo Albotra   mipadayag nga dili magpanuko ang CPPO nga mopasaka og kasong kriminal ug administratiba ang si bisan kinsa nga nalambigit  sa ilegal nga kalihokan.

“And if in case mahibaw-an nato nga naa g’yuy involved ana we will not hesitate to file both criminal and administrative charges against this people and aside from that we will exert effort of conducting police action,” sigun pa ni Albotra.

Si Albotra miingon nga hangtud karon padayon ang PNP sa paglimpyo sa ilang han-ay gikan sa mga badlungon nga ilang mga kauban.

Sigun pa sa opisyal nga andam ang ilang buhatan nga mohimo og hiniusang imbestigasyon sa lain nga buhatan kung duna sila’y ebidensya.

“The CPPO is open for any inter- agency coordination kung naa sila’y ihatag nga information nga makatabang sa pagsumpo ani nga ilegal nga drugas,” dugang pa ni Albotra.

Hinuon sa nakuha nga impormasyon sa mga tigbalita wala gibutyag kung asa nadestino ang maong mga polis nga gipasanginlan. – /EIM) (BANAT NEWS)