Konsehal Cabahug magpasuspenso

CEBU, Philippines - Andam motuman si Konsehal Editha Cabahug sa 60 ka adlaw nga preventive suspension.

Apan giklaro ni Cabahug nga limpyo ang iyang konsensiya sanglit dili man pagpangawkaw og kuwarta sa katawhan ang kaso.

Gitataw ni Cabahug nga naglikay lang siya nga makahimo og kalapasan sa pagpagawas sa pundong salapi sa ilang panudlanan sa barangay Looc diha’ng siya pa ang kapitan.

Matud sa abogado ni Cabahug, Atty. Benjamin Cabrido, nga ang preventive suspension wala magpasabot nga gihukman na ang iyang kliyente sa kaso.

Matud ni Cabrido nga mohimo pa sila og legal nga mga lakang alang sa pagpalingkawas sa iyang kliyente pinaagi sa pagpresentar og dugang pa nga mga bag-ong ebidensiya. Ang preventive suspension kang Cabahug niadto pa unta’ng Disyembre 9, 2013 nga naglakip nila’ng Erlinda Tarong, Liborio  Arcana, Jose Lozano Jr., Alejandro Jayme, Raul Skipper Cabahug, Raul Kevin Cabahug, Alberto Cabahug ug Lilitha Basconillo.

Niduso og motion for reconsideration ang mga sinumbong apan gibasura sa korte ug nimando sa Department of Interior and Local Government (DILG) sa pagpatuman sa kamandoan.

Ubang sinumbong wala na sa katungdanan gawas nilang Cabahug nga karon konsehal sa dakbayan ug konsehal Raul Kevin Cabahug sa barangay Looc.  (BANAT NEWS)