Nanghulga nga mamusil napusilan
CEBU, Philippines - Nalandig sa tambalanan ang usa ka 43-anyos nga lalaki nga gituohang tiggamitan og shabu human naunhan pagpusil sa kapolisan nga iyang gitionan aron makaikyas dihang siya gidakop alas 10 pasado niadtong Biyernes sa gabii sa Purok Radar, Babag Dos, dakbayan sa Lapu-Lapu.
Ang suspek nga si Alvin Legaspi, taga Purok Rambo sa mao’ng lugar ang nadakpan pinaagi sa buy-bust operation sa City Intelligence Branch sa Lapu-Lapu City Police Office nga gipangulohan ni Senior Insp. Rogelio Pineda, Jr.
Usa ka medium size nga putos sa shabu ug 15 ka gagmay’ng pakete ang nasakmit gikan ni Legaspi nga gibanabana’ng moabot sa P30 mil.
Gawas sa mga drug paraphernalia, nakuha sab sa kapolisan ang wala’y lisensiya nga .45 caliber kang Legaspi, usa ka magazine nga adunay unom ka buhing bala ug ang P5 mil nga kwarta ug Nokia nga cellphone.
Si Pineda miingon nga mihulga ang suspek nga mopusil sa kapolisan aron makaikyas apan napakyas human naunhan og pusil gikan sa usa sa mga sakop ni Pineda. Nakaangkon og samad pinusilan ang suspek sa iya’ng wala nga bukton ug gidala sa tambalanan ug pasakaan og kaso. (BANAT NEWS)
- Latest
