Paglambo sa agrikultura napanglantawan
CEBU, Philippines - Napanglantawan sa Department of Agriculture nga molambo pa ang industriya sa agrikultura sa rehiyon labi na sa livestock ug meat production karong tuiga. Ang gobiyerno nangandam na sa hagit kabahin sa “free trade agreement” sa Southeast Asian Nations diin lakip niini ang Pilipinas. Si Joel Elumba, DA-7 regional technical director, nagkanayon nga sa tuig 2013, ang Central Visayas naka-produced og duha ka milyon metriko tonelada sa karne gikan sa artificial insemination (AI) sa mga hayopan sa kaumahan. Si Rudito Mumar, regional AI coordinator sa DA-7, nibutyag nga sa samang tuig, ang Central Visayas duna’y 28 porsiyento sa kinatibuk-ang populasyon sa baka sa tibuok nasud.
Sa laing bahin, si Dr. Caro Salces, director sa Philippine Carabao Center (PCC) sa Ubay Stock Farm sa Bohol, nagkanayon nga dili usab lig-on ang dairy production sa ubang ASEAN nga nasud. Ang nasud padayun nga nag-import og 98 porsiyento sa kinatibuk-an produkto sa gatas sa merkado.
Ang PCC uban sa National Artificial Insemination Breeding Center ug National Dairy Corporation nihatag og libreng semen ug trainings sa AI technicians sa mga lokal nga kagamhanan.
Ang probinsiya sa Sugbo nga nag-prioritize sa food security ug agrikultura adunay P11 milyones nga nitrogen plant aron pagpreserba sa semen una kini ibalhin ngadto sa mga LGU.
Matud ni Salces nga ang kalampusan sa programa ug pag-uswag sa livestock industry ubos kini sa commitment sa AI technicians ubos sa suporta sa LGU. (BANAT NEWS)
- Latest