Night dwellers may ilegal nga buhat

CEBU, Philippines -  Nipasidaan si San Roque Barangay Kapitan Lidiore "Boy" Miranda sa publiko labot sa ilegal nga gipangbuhat sa uba’ng street night dwellers ug vendors.

Pipila ka semana ang nilabay, ang mga sakop sa Task Force for a Better Life sa kagamhanan sa siyudad sa Sugbo, nakadiskubre og marijuana ug pipila ka mga syringes sa usa sa mga bag sa usa ka street night dweller.

Ang task force ang mangsikop sa mga night dwellers aron adto pakatulgon sa San Roque Gym ug papaulion igka buntag.

Matud ni Miranda adunay usa ka tawo nga nikuha sa bag apan ilang gikwestiyon kay ilang nabantayan nga ang tawo wala nila madakpi isip night dweller.

Sa ilang pagsukit-sukit sa maong tawo, ilang napamatud-an nga dili gyud diay iya ang maong bag.

Nakit-an sa maong bag ang linukot nga marijuana ug syringes apan nakalakaw na ang maong tawo.

Ila na lang gihatag ang mga nadiskubrehang ilegal nga mga butang sa kapolisan.

Tungod sa insidente, gisaad ni Miranda nga magmabinantayon sila sa pagsikop sa mga night dwellers ug ilang ipadayun ang operasyon hangtud sa Sinulog 2015.

Sukad gihimo ang operasyon sa niaging mga semana, giingong niminus na ang mga night dwellers nga ilang nasikop.

Samtang matud ni Isabelita "Betty" Ganub, executive director sa Anti-Mendicancy Task Force, nga dili responsibilidad sa siyudad ang mga night dwellers tungod ang sagad kanila dili residente sa siyudad apan gusto sa kagamhanan sa siyudad sa Sugbo nga matabangan.

Ang siyudad adunay Balik-Probinsya Program nga naghatag og libre’ng plete sa mga night dwellers nga makauli sa ilang tagsa-tagsa ka probinsya. (BANAT NEWS)