Bonus sa taga City Hall gihatag na
CEBU, Philippines - Nakadawat na sa tag P10 mil nga Christmas bonus ang mga empleyado sa Cebu City Hall niadtong Biyernes sa gabii atol sa ilang party.
Matud ni City Treasurer Diwa Cuevas ang mga department heads na ang mangapod-apod sa bonus ngadto sa ilang kawani.
Sa niaging tuig P20 mil ang nadawat sa mga empleyado sa City Hall lakip na ang calamity assistance samtang sa pagkakaron tag P10 mil lang isip ilang Performance Enhancement Incentives (PEI).
Ang makadawat sa maong P10 mil nga Christmas bonus mao ang opisyal, mga permanente ug casual nga mga kawani.
Mokabat sa P49,940,480 ang gahin sa kagamhanan sa dakbayan sa Sugbo alang sa bonus sa 4,948 ka mga opisyal ug mga kawani.
Gawas sa tag P10 mil, nakadawat pud og hamonada ug lima ka kilo nga bugas samtang ang mga Job Order nakadawat lang og hamonada ug lima ka kilo nga bugas.
“Merry Christmas and advance happy New Year, I know they will be happy sa pag-celebrate sa Christmas because they have the P10,000,” matud ni Cuevas. (BANAT NEWS)
- Latest
