Bag-ong nakagawas sa prisohan gipusil patay
CEBU, Philippines – Lalaki nga bag-ong gawas sa miaging semana sa Lapu-Lapu City Jail ang gipusil patay niadtong Domingo sa kaadlawon sa Soong 2, barangay Mactan, sa maong dakbayan.
Ang biktima mao si Martin Icoy, Jr., 22-anyos, kinsa gipusil sa makadaghang higayun gawas sa ilang balay.
Sa inisyal nga imbestigasyon ni SPO1 Allan Pantaleon sa Homicide Section, ang amahan sa biktima nga si Martin Icoy Sr. miingon nga nagtagay ang iyang anak kuyog sa mga silingan dihang nakadungog sila og sunod-sunod nga buto sa pusil.
Iyang nakit-an nga adunay duha ka lalaki nga nagmotor ang niduol sa iyang dapit ug gipauwanan og bala ang lawas sa biktima dayun sibat.
Si Annaliza nga igsuon sa biktima niasoy natulog ang iyang igsoon sa usa ka kawayan nga lingkuranan gawas sa ilang balay dihang gipusil patay.
Samtang tungod sa usa ka libo nga utang, gibuk-an sa ulo sa usa ka lalaki ang iyang silingan sa Pitalo, San Fernando niadtong Domingo sa buntag.
Ang biktima naila nga si Harry Largosa samtang ang suspek naila sab nga si Ronnie Navales, pareho nga nagpuyo sa maong lugar.
Matud ni PO1 Fernando Mata sa San Fernando Police nga duna na’y kanhi bikil ang duha may kalabutan gihapon sa kuwarta.
Giingong nahitabo ang panaglalis sa duha dihang gipaningil ni Navales si Largosa.
Atol sa lalis nikuha og armas si Navales dayun pusil tumong sa tiyan ni Largosa ug gi-usban kini og pusil igo sa ulo sa biktima.
Daling nisibat ang suspek samtang gidala sa Carcar District Hospital si Largosa apan nakabsan gyud sa iyang kinabuhi.
Nasikop na si Navales sa kapolisan ug gikatakdang pasakaan og kasong murder. – /GMR) (BANAT NEWS)
- Latest