P70M nga budget sa dredging wa aprobahi

CEBU, Philippines - Wala nay pagpalawom sa kasapaan nga pagahimuon dinhi sa dakbayan sa Sugbo karong tuiga human nga wala aprobahi sa Cebu City Council ang gisugyot nga P70 milyones nga maoy gastohon sa maong proyekto.

Ang mga konsehal nga sakop sa Bando Osmeña Pundok Kauswagan (BOPK) mikuwestiyon sa paggamit sa pundo nga para sa pagpalambo sa Mahiga Creek nga gamiton sa ubang kasapaan ug gipaagi sa Supplemental Budget.

Diha nga gihimo ang botasyon, pito ka konsehal sa BOPK ang misupak nga aprobahan ang mao nga budget samtang unom ra ang mga konsehal sa Team Rama nga misuporta.

Walo g’yud ka konsehal sa Team Rama ang mitambong sa sesyon sa konseho kagahapon apan si Konsehal Mary Ann De Los Santos migawas dihang gihimo ang botasyon samtang si Konsehal James Cuenco wala mobotar.

Si Mayor Michael Rama gusto nga magpakisayod ngano nga dunay mga konsehal sa Team Rama nga wala mosuporta nga aprobahan ang gisugyot nga resolusyon ni Konsehal Gerardo Carillo.

Kun si Konsehal Delos Santos ug Cuenco mibotar pa sa pag-aprobar sa P70 milyones nga budget, maaprobahan unta ang gisugyot nga budget para sa dredging kay siyam man sila ka Team Rama.

Matud ni Carillo nga wala siya masagmuyo ug girespetohan niya ang baruganan sa mga kauban niyang konsehal nga mosuporta sa iyang tinguha.

Si Konsehal Sisinio Andales, usa ka alyado sa BOPK, miingon nga usik-usik ra sa kuwarta ang dredging nga dili maoy hingpit nga sulbad sa paglunop sa dakbayan.

Sa laing bahin, giaprobahan sa konseho ang pagpagahin og P325 mil aron gastohon sa paghatag og honorarium sa mga Fire Auxiliary forces sa lainlaing barangay dinhi sa dakbayan.

Ang mga barangay nga adunay fire trucks ug bombero mao ang Luz, Mabolo, Hippodromo, Sta. Cruz, Apas, Labangon, Sambag 2, Sto. Nino, Ermita, Tisa, Inayawan, Quiot, Tejero, Pasil, Basak San Nicolas, Cogon Pardo, Poblacion Pardo ug Suba. (BANAT NEWS)