Pista sa Birhen sa Regla gipangandaman

CEBU, Philippines - Gipangandaman na sa siyudad sa Lapu-Lapu ang umaabot nga kapistahan sa Birhen sa Regla. Usa ka fluvial procession sa imahen sa Birhen sa Regla ang himuon sa dakbayan sa Lapu-Lapu karong Nobiyembre 12 ug mao ‘sab kini ang unang adlaw sa nobenaryo.

Mao na kini ang ika-14 nga fluvial procession nga giandam sa City Tourism Commission. Si Sunshine Alegre, organizer sa kalihukan nagkanayon nga sugdan kini sa Pacific Cebu Resort Wharf sa Barangay Subabasbas sa alas-7 sa buntag samtang ang culmination proper sa mao nga kalihukan himoon sa Muelle Osmeña sa Barangay Poblacion.

Si Donatila Amores, Tourism Commissioner sa dakbayan maoy mangulo sa fluvial committee. Sugdan kini pinaagi sa usa ka Santos nga Misa sa Marigondon Parish Church sa dili pa i-prusisyon nga kuyogan nila ni  Mayor Paz Radaza kuyog sa mga konsehal sa siyudad gikan sa Muelle Osmeña padung sa Simbahan sa Birhen Sa Regla.

Dugang pa ni Alegre, ang imahe sa Birhen sa Regla i-motorkada  sa sakop sa Lapu-Lapu City Police Office ug City Traffic Management   Systems.

Human niini,  isakay kini sa usa ka yati aron ibiyahe sa Mactan Channel padung sa Muelle Osmeña Wharf.

Dunay mga buwak nga isabwag sa Philippine Air Force sa fluvial procession.

Aron mas monindot ang fluvial procession, adunay ganti ang mga sakyanan sa dagat nga dunay labing nindot nga adorno.

Adunay bangka nga giandam alang sa mga medical rescuers ug  mga sakop sa media nga gusto mo-cover sa mao nga kalihukan.(Christell Fatima M. Tudtud/EIM)(BANAT NEWS)