Programa sa kapolisan sa Talisay suportado ni JVR

CEBU, Philippines - Gipasalig ni Talisay City Mayor Johnny De los Reyes nga suportaan niya ang shooting refresher course alang sa kapolisan sa dakbayan.

Gani buot ni De los Reyes nga himuong quarterly ang pagpahigayon sa kalihukan aron mabansay gyud ang katakus sa kapolisan sa pagpamusil.

Nalipay ang hepe sa kapolisan sa dakbayan sa Talisay, Police Superintendent Reycel Carmelo Dayon tungod sa suporta sa mayor.

Matud ni Dayon nga usa sa nakaaghat kaniya sa pagbuhat og programa mao kadtong usa ka polis nga wala nakaigo sa iyang gipusil nga suspek ug naka-eskapo.

Usa sa problema nga nasugatan sa maong programa ang kakuwang sa bala.

Samtang gidayeg ni De los Reyes ang kapolisan sa dakbayan tungod sa malinawong pagsaulog sa kapistahan sa niaging semana diin wala’y natala nga kagubot bisan sa kabaga sa tawo.

Nanghinaut ang mayor nga sa umaabot kalag-kalag hapsay gihapon ang dagan sa dakbayan.

Si Dayon miingon nga makig-alayon sila sa simbahan kung asa ang dapit nga daghang tawo nga sementeryo.

Nitambag usab si Dayon sa katawhan nga dili magdala og botelya sa ilimnong makahubog, mahait nga butang ug uban pa’ng ginadili sulod sa sementeryo aron malikayan ang pagkadelatar sa pagsulod.

Iya usab tambag nga dili magdungan og adto sa sementeryo ug dili biyaan ang balay aron malikay sa lungkab. (Khacel Anne Sanchez/GMR)(BANAT NEWS)