Duha gikan nagbilar gipamusil

CEBU, Philippines - Nalandig sa tambalanan ang duha ka mag-agaw human gipaulanan og bala sa tulo ka lalaki sa barangay Vito, Minglanilla kagahapon sa alas tres sa kadlawon.

Ang mga biktima naila nga sila si Reynald Zamora, 24, ug Arjay Unabia, 22, pulos ulitawo nga nagpuyo sa Ward 1, sa maong lungsod.

Matud ni PO2 Vincent Aliñabo sa Minglanilla Police nga nahinabi sa Banat News nga gikan nagbilar ang duha ka mag-agaw sa ilang amigo nga gipatay niadtong nakalabay nga adlaw.

Pipila ka minutos sa ilang paglakaw kalit lang milanog ang buto-buto sa armas diin samad sa tuhod ang naangkon ni Unabia samtang samad sa wala nga tiil ang naangkon ni Zamora. Daling gidala sa Minglanilla District Hospital ang mga biktima nga luwas na sa delikadong kahimtang.

Duda ang kapolisan nga posibleng may kalabutan sa nahitabo nga pagpatay sa ilang barkada nga ilang gibilaran ang insidente. (BANAT NEWS)