Toledo City treasurer midangop sa NBI

CEBU, Philippines - Ang National Bureau of Investigation (NBI) giawhag pagtabang sa pag-imbestigar sa pagpangawat sa wala pa mabana-bana nga kantidad gikan sa Toledo City Treasurer’s Office kay dako ang pagduda nga may mga kawani sa City Hall nga nalambigit sa hitabo.

Bisan si City Treasurer Ofelia Oliva nga nakahinabi sa Banat News nagtuo gayud nga dili pulos “outsiders” ang mga kawatan nga misulod sa City Treasurer’s Office kay nakatultol sila hain mahimutang ang vault nga gisudlan sa kuwarta.

Matud ni Oliva nga kun taga gawas pa pulos ang nangawat gisulod na unta ang iya g’yud nga opisina kay magtuo man sila nga ang vault nga gisudlan sa kuwarta anaa gayud sa opisina sa treasurer ibutang.

Ang kapolisan miingon nga adunay upat ka kawani nga ilang gidudahan mao nga gipangkuhaan sila og fingerprints.

Ang mga kawatan yano kaayo nga nakasulod sa City Treasurer’s Office nga walay giguba. Wala pa mohatag og bana-bana si Oliva kun pila ang kantidad sa kuwarta nga nakuha sa mga kawatan, apan dunay nahibiling P95mil.

Bag-ohay pa lang nga ang mga disbursing officers mikobra og P3 milyones gikan sa bangko alang sa honorarium sa mga magtutudlo, ug laing P3 milyones nga para sa suweldo sa mga Job Order workers. Gibutyag usab ni Oliva nga apil ang payroll gidala sa mga tulisan mao nga dili dayon mahibaw-an kun pila pa ang kuwarta sa vault.  Samtang ang hepe sa Toledo City Police nga si Chief Inspector Ricky Delilis miingon nga posibleng inside job ang nahitabo human nga walay nakitang timailhan nga pugsanong giguba o gilungkab ang maong buhatan.

Bisan si Cebu Provincial Police director Noel Gillamac miingon nga dako kaayo ang posibilidad nga ang mga kawatan nasayod g’yud sa mga impormasyon diha sa sulod. (BANAT NEWS)