Nangarnap nadakpan sa checkpoint

CEBU, Philippines - Nadakpan sa checkpoint sa  kapolisan sa Presinto 3 sa Mandaue City Police Office (MCPO) ang duha ka tawo ug nakuhaan og shabu luwan sa  gi-carnapp nga motorsiklo sa dalan H. Abellana, Barangay Basak, Dakbayan sa Mandaue alas-12 pasado ang takna kagahapon sa tungang gabii.

Si  PO2 Gerald Magpantay sa kapolisan sa Presinto 3 sa MCPO miila sa duha nga nadakpan mao sila si  Regie Ariola Ejorango,  34,   ug Euelmar Mancao, 18, taga Sitio Bas, Barangay Pagsabungan sa maong dakbayan.

Matud pa ni Magpantay nga ang tag-iya sa motorsiklo nga si Nilo Branzuela, 51, taga Sitio Bas, Barangay Pagsabungan kinsa mireklamo sa ilang buhatan nga gikawat ang iyang motorsiklo.

Dugang pa ni Magpantay nga ang team sa kapolisan sa Presinto 3 nga gipangulohan sa ilang hepe nga si Senior Inspector Genilo Veraque  nagpahigayon og checkpoint alas-12 pasado ang takna sa tungang gabii niadtong Domingo.

Sumala pa ni Magpantay nga si Ejorango nga maoy nagmaneho sa motor wala makahatag sa rehistro hinungdan nga ilang girikisa ang kalawasan ug ilang nakuhaan og duha ka gagmay’ng paketeng shabu ug drug paraphernalia usab  ang ilang nakuha sa kauban niini.

Si Branzuela  positibo usab nga miila sa motorsiklo nga gidala sa duha ka dinakpan nga mao kini ang iyang gipangita nga kalit lang nawagtang sa iyang giparkingan sa gawas sa ilang panimalay.  (BANAT NEWS)