Duha nadakpan naghupot og ilegal nga drugas

CEBU, Philippines - Nadakpan sa kapolisan ang 56-anyos nga lalaki nga gituohang namalit og shabu sa lungsod sa Consolacion kaniadtong Sabado sa tungang gabii.

Ang nadakpan mao si Romeo Alinsug, minyo nga taga Poblacion Oriental, Consolacion nga nakuhaan og duha ka gagmay nga pakete’ng shabu ug drug  paraphernalia.

Matud sa kapolisan nga usa ka concern citizen ang nanawag kanila ug nagpahibalo nga may duha ka tawo nga nasigpatan sa mga lumolupyo sa maong dapit nga kadudahan ang mga lihok.

Gihimoan nila og pakisusi ang gitumbok nga dapit nga gitaho ngadto kanila sa nagpakabana nga lumolupyo apan sa ilang pag-abot mikaratil og dagan ang usa ka lalaki ug gibiyaan lang ang iyang kauban nga si Alinsug.

Ang kapolisan sa Consolacion miingon nga si Alinsug nakalitan ug wala makalihok ilang girekisa ang mga bulsa ug maoy ilang nakuha ang duha ka gagmay nga pakete nga shabu ug drug paraphernalia.

Ang suspetsado nga gisukit-sukit sa kapolisan mipasangil nga igo lang kini nga gisugo pagpalit og shabu ug ang wala hiilhing lalaki nga midagan nga maoy una nga nakakita sa pag-abot sa mga polis maoy iyang gipalitan sa shabu.

Samtang sa Sitio Kawayanan, Barangay Yati, lungsod sa Liloan nadakpan usab sa kapolisan ug nasakmitan og mga pinaugang dahon sa marijuana si Regie Sugarol, 31 anyos nga nagpuyo sa maong dapit.

Si PO3 Jesson Gayo miingon nga ang team sa mga polis sa Liloan nga gipangulohan ni SPO3 Octavio dela Paz nagpatrolya sa mga hilit nga lugar sa kabarangayan sa Liloan.

Sa ilang pag-agi sa usa ka hilit nga lugar sa Barangay Yati maoy ilang nalabyan ang duha ka tawo nga ingon sa gikuyawan pagkakita kanila nga nakaaghat kanila sa pagrekisa.

Sa pagrekisa sa mga bulsa ni Sugarol ilang nakuha ang duha ka linikit nga pinaugang dahon sa marijuana nga nakaaghat kanila sa pag-dakop sa suspetsado samtang ang kauban wala apila kay wala makuhai og drugas.  (BANAT NEWS)