Atty. Sipalay loyal kang JVR
CEBU, Philippines - Gikwestiyon ang loyalty ni Talisay City Legal Officer Alfredo Sipalay taliwala sa bangi nilang Mayor Johnny de los Reyes ug Bise Mayor Romeo Villarante.
Si Villarante ang nirekomendar kang Sipalay nga molingkod sa gihuptan niining posisyon karon sa dakbayan.
Si Sipalay nga nahinabi sa mga tigbalita mibutyag nga sa dili pa bise mayor sa Talisay si Villarante, daan na silang managhigala niadtong milabay’ng eleksiyon diin mitabang siya sa grupo sa Liberal Party (LP) sa Talisay isip legal counsel.
“I’ve been a lawyer for almost 25 years, sa akong pangabogado, sa akong profession wa gyud ko mibaligya bisan kausa sa akong mga kliyente, I have been loyal to my clients, I have been loyal to my oath as a lawyer,” pasabot ni Sipalay.
Migawas ang report nga giingong gibaligya ni Sipalay ang mayor aron masamok ang administrasyon niini apan gihimakak sa abogado.
Matud ni Sipalay nga sa nahimo niyang mga sipyat wala magpasabot nga gibaligya niya ang mayor aron makapuntos ang bise mayor.
Giklaro ni Sipalay nga ang iyang loyalty naa sa mayor kinsa mikompirmar sa mga pamahayag sa abogado.
Matud sa mayor nga wala siya’y nakita nga dili matinud-anon ngadto kaniya si Sipalay.
Dugang ni de los Reyes nga wala siya’y nakitang mga butang o lihok ni Sipalay nga makahatag kaniya og pagduda sa loyalty niini ngadto kaniya. (/GMR)(BANAT NEWS)
- Latest
