P200 mil nawagtang sa savings account sa kanhi polis

CEBU, Philippines - Nidangop sa buhatan sa kapolisan ang usa ka retiradong polis nga babaye human kapin sa P200 mil nga kwarta ang giingong gikawat gikan sa iyang savings account sa usa ka bangko.

Ang nagpa-blotter sa Talisay City Police Station mao si Maria Paz Rosales, 65, taga Barangay Nonoc, sa maong dakbayan.

Si PO2 Romel Montejo, desk officer sa Talisay City Police Station, mibutyag sa Banat News nga niadtong Hunyo 8 sa gabii mi-withdraw si Rosales sa automated teller machine (ATM) nga nahimutang sa Tabunok.

Matud sa biktima nga nakabantay siyang dunay usa ka wala mailhing tawo ang misunod kaniya apan wala lang niya panumbalinga.

Pagkasunod adlaw, Hunyo 9, mi-withdraw na usab siya og kwarta sa ATM apan nahibulong siyang sayop na ang iyang personal identification number (PIN) hinungdan nga miadto siya sa bangko.

Nasuta nga dunay laing mi-withdraw sa iyang kwarta bali og P100 mil samtang nagamit usab ang iyang account sa laing higayun sa pagbayad sa grocery didto sa Manila.

Matud sa biktima nga mikabat sa P210 mil ang nakawat sa iyang kwarta. (BANAT NEWS)