Si Pachoy nadakpan na

CEBU, Philippines - Nadakpan na ang suspetsado nga drug pusher nga miangko’ng maoy nagpatay sa pag-umangkon  ni Cebu City Acting Mayor Edgardo Labella ug giingon nga nalambigit usab sa daghan pa nga mga pagpamatay.

Si Manuel Richard Corominas, 35, nga naila sa angga nga Pachoy nadakpan sa kapolisan diha’ng miduaw siya sa iyang pamilya sa Barangay Day-as alas tres kagahapon sa kaadlawon.

Ang mga sakop sa Pari-an Police Station ug City Intelligence Branch (CIB) nga gipangulohan ni Superintendent Romeo Santander nakadawat og kasayuran nga si Pachoy mag-ulian sa iyang gipuy-an sa Barangay Day-as panahon sa lawom na nga gabii.

Mga polis nga nagpatuo lang nga ordinaryo’ng sibilyan gidestino na daan sa dapit nga agianan ni Pachoy paingon sa gipuy-an sa iya’ng pamilya.

Kagahapon sa kaadlawon may nakatug-an sa kapolisan nga si Pachoy nasigpatan na nga naglakaw sa Sitio Upper Day-as nga adunay dala nga granada ug armas.

Human masuta sa kapolisan nga armado si Pachoy, abtik nila kini nga gidakop samtang wala pa makabonot sa iyang giluklok nga armas. Matud sa mga polis nga si Pachoy nasakmitan nila og kalibre 45 nga pistola, usa ka .38 kalibre nga revolver ug usa ka granada.

Si Pachoy miangkon sa Banat News nga siya ang mipusil ug mipatay ni Rolan Colina nga pag-umangkon ni Acting Mayor Labella tungod sa panagbikil bahin sa drugas ug kuwarta. Giangkon ni Labella nga ang iyang pag-umangkon nalambigit gayud sa bisyo sa gidili nga matang sa drugas sa wala pa kini patya sulod sa usa ka drug den sa Day-as pipila ka semana ang milabay.

Ang kapolisan mitug-an nga si Pachoy usa sa nalambigit niadto’ng sunod-sunod nga pagpangilog og sakyanan didto sa Talisay ug dinhi sa dakbayan sa Sugbo diin duha sa tag-iya’g sakyanan gipusil.

Ang kapolisan sa Talisay mitug-an usab nga karong adlawa pasakaan nila og kaso si Pachoy kay mao kini ang mipusil ug mipatay sa iyang amigo, ug miangol sa laing kauban, kay midumili pagkuyog sa lakaw sa ilang grupo.

Si Pachoy wala moangkon og kalambigitan sa nahitabo nga pagpangilog og sakyanan ingon man niadtong pagpamusil didto sa Talisay ug wala usab niya angkona nga iya ang armas nga giingon nga nakuha gikan kaniya. (BANAT NEWS)