Mga kawani sa Kapitolyo nasakpan ni Davide nga nag-inom

CEBU, Philippines - Walo ka kawani sa Kapitolyo ang nasakpang nag-inom og ilimnong makahubog atol sa oras nga tingtrabaho kaniadtong Biyernes sa hapon.

Si Gobernador Hilario Davide III mismo ang nakasakop sa lima ka kawani sa Provincial Disaster Risk Reduction and Management Office (PDRRMO) kinsa usa kanila babaye apan dili mga regular nga kawani.

Lain pa g’yung tulo ka kawani nga nadistino sa Provincial Health Office ang nasakpan usab nga nag-inom gihapon sa duol nga tindahan apan kawani na sa Kapitolyo ang nakasakop kanila ug mireport ‘sab ngadto sa gobernador.

Matud ni Davide nga iyang drayber ang nitug-an kaniya nga may nag-inom sulod sa usa ka Tea House sa dalan Don Jose Avila hinungdan nga siya mismo ang nisusi pasado alas dos sa hapon kaniadtong Biyernes.

“Ako giadto, nagtoo sila mo-ipon ko kay ang usa nitagad man, abi nila moapil ko,” matud ni Davide.

Matud ni Davide nga iyang gibadlong ang grupo sa kasayon nga nag-inom apan giingon nga nangatarungan nga on leave sila niadtong higayuna.

Gibaharan ni Davide ang lima nga makatilaw g’yud sila kun dili tinuod ang ilang pangangkon nga sila on leave sa mao’ng higayon.

Nasuta sa rekords sa Human Resource Management Office nga on duty ang lima ka kawani hinungdan nga gipasa ni Davide sa Committee on Discipline and Investigation (CODI) ang kaso.

Ang hepe sa PDRRMO, Baltazar Tribunalo Jr., namahayag nga hayan matangtang g’yud ang maong mga kawani sa ilang trabaho sanglit nakalapas man sila sa lagda. “Di na kinahanglan imbestigaron, si Gov. g’yud ang nakakita,” matud ni Tribunalo.

Apan iya’ng giklaro nga ipaagi gihapon sa proseso ang unsa man nga silot nga ipahamtang ngadto sa mga nasakpan.

Samtang nasuta usab nga namakak ang laing tulo ka kawani sa PHO nga nasakpang nag-inom duol sa Kapitolyo sa likod nga bahin sa Legislative Building human miangkon nga undertime sila alas 4 sa hapon sa maong adlaw.

Ang CODI maoy gitahasan sa pag-imbestigar sa maong mga kawani.

“Tingale ila’ng hunahuna nga buotan ra kaayo ko,” matud ni Davide. (/RUB)(BANAT NEWS)