CPPO mas agresibo batok drugas
CEBU, Philippines - Mas agresibo karon ang kapolisan sa lalawigan sa Sugbo sa kampanya batok sa ilegal nga drugas itandi sa niaging tuig.
Kini human nakatala ang Cebu Provincial Police Office og 173 ka operasyon gikan Enero hangtod Marso ning tuiga samtang 95 lang sa samang buwan sa niaging tuig.
Sa maong operasyon, 236 ka tawo ang nasikop diin 116 ang drug pushers ug 112 ang drug users samtang walo ang nasikop pinaagi sa warrant of arrest sa kalapasan sa RA 9165 o Dangerous Drugs Act of 2002.
Base sa statistics sa miaging tuig, 118 ang nasikop diin 44 ang drug pushers ug 71 ang drug users ug tulo ang nasikop pinaagi sa warrant of arrest.
Adunay 170 nga kaso nga napasaka karong tuiga kumpara sa 89 sa miaging tuig.
Ang total Dangerous Drugs Board value sa 28.74 gramos sa shabu mokabat sa P1,594,727.45 karon diin mas ubos kini sa P4,594,603 sa 233.22 grams sa shabu sa miaging tuig.
Si CPPO Deputy Provincial Director for Operation, Supt. Anthony Bagarinao, mibutyag nga misaka ang gidaghanun sa operasyon karong tuiga tungod kay nagpakabana na ang komunidad batok sa ilegal nga drugas.
“Nidaghan na ang nireport og impormasyon sa kapulisan bahin sa ilegal drugs meaning nibalik ang ilang pagsalig sa kapulisan,†matud ni Bagarinao.
Lakip sa nakatampo sa pagsaka sa operasyon mao ang direktiba ni CPPO Director, Sr. Supt. Noel Gillamac, nga ang matag police station kinahanglan nga dunay duha ka mga positive operations sa usa ka semana. “The more operations ang mahimo, magkadaghan ang madakpan kay kada police station kinahanglan dunay accomplishment twice a week unya ang counted ana ang dunay arrest lang gyud,†matud ni Bagarinao. (BANAT NEWS)
- Latest
